Во периодот 25 април – 2 мај 2012 година проф. д-р Викторија Коларовска-Гмирја беше член на жирито на Третата меѓународна конференција  - натпревар на студентите по музикологија, која се одржа на Државниот конзерваториум „В. Сараџишвили“ во Тбилиси – Грузија.

Композиторот и Доцент на Факултетот за музичка уметност во Скопје, Сони Петровски, на минатонеделната Седница на Собранието на Сојузот на композиторите на Македонија – СОКОМ беше избран за нов Претседател, кој со здружението ќе раководи во следните две години. Петровски, на чело на СОКОМ доаѓа по неколкугодишното членство во Претседателството на здружението. Во периодот од 2005 до 2007 година, тој ја извршуваше и функцијата уметнички директор на најзначајната манифестација која ја организира СОКОМ – фестивалот „Денови на македонска музика“. Вели дека честа да претседава со СОКОМ како асоцијација на еминентни музички автори е огромна и дека основна цел за време на неговиот мандат ќе биде да се задржи авторитетот на СОКОМ, нивото и квалитетот на она што е создавано децении наназад, но да прострујат и свежи идеи и да се надградат одредени сегменти од дејностите на Здружението.

Претседавањето со Сојузот на композиторите на Македонија е функција, која иако не е од материјален бенефит, носи голем престиж. Чинам дека Вие сте еден од најмладите автори кои во 65-годшната историја на СОКОМ застанал на чело на оваа елитна асоцијација на музички автори и писатели, што несомнено е огромна чест. Што за Вас претставува оваа функција и кои според Вас се најголемите предизвици што таа ги носи со себе?